! … ምርጫ የሌለው ‘ምርጫ’ … Election without Choices …!

ኢህኣዴግ ብቻውን (‘ብቻውን’ ያልኩበት ምክንያት በምርጫው የሚሳተፉ የተቃዋሚ ፓርቲ ተወካዮች አነስተኛ ቁጥር ስለሚይዙ ነው) እየተወዳደረ (ይቅርታ እየተመረጠ …. ይቅርታ እየሾመ ….. ይቅርታ ለመወዳደር ተወዳዳሪ ያስፈልጋል፣ ለመመረጥም ተመራጮች መኖር አለባቸው) የምርጫ ካርድ ‘ወሰዳቹ ኣልወሰዳቹ’ እያለ ያዋክበናል።

ካድሬዎች ቤት ለቤት እየዞሩ የምርጫ ካርድ ቁጥር ይመዘግባሉ፣ ካርድ ያላወጣ እንዲያወጣ (ትእዛዝ በሚመስል መልኩ) ይገፋፋሉ። በየመንግስት ቢሮዎቹ የምርጫ ካርድ ያላቸውና የሌላቸው ሰራተኞች ይለያሉ። ይሄን ሁሉ ለምን አስፈለገ?

ዜጎች የመምረጥ (ወይ የመመረጥ) መብት ያላቸው ያህል (ካላሰኛቸው) ያለመምረጥ (የምርጫ ካርድ ያለማውጣት) መብት ‘ኮ‘ ኣላቸው። መምረጥ መብት እንጂ ግዴታ አይደለም። ዜጎች በምርጫ እንዲሳተፉ ቅስቀሳና እገዛ ማድረግ ተገቢና የሚደገፍ ነው። ግን ይሄን መደረግ ያለበት ምርጫ ሲኖር እንጂ ሰዎች ተሰልፈው (ቆመው) እንዲውሉ ለማድረግ መሆን የለበትም። በምርጫ ሰበብ ሰዎች ስራ ፈተው ወረፋ ይዘው ቢውሉ ምን ፋይዳ አለው? ምን ለውጥ ያመጣሉ? ያው የሚወዳደረው ኢህኣዴግ ነው፤ ‘የሚመረጠውም’ ኢህኣዴግ ነው። ለውጥ ለሌለው ነገር … ኪሳራ ነው።

ምርጫ ‘ምርጫ’ የሚሆነው አማራጮች ሲኖሩት ነው። የአሁኑ ምርጫ አማራጮች አሉት? መራጩ ህዝብ ስለነዚህ አማራጮች ሙሉ መረጃ አለው? መረጃው የተገኘው ከነፃና ገለልተኛ ሚድያ ነው? ለመሆኑ ነፃ ሚድያ ተፈቅዷል? ህዝቡ መረጃ የማግኘት ሙሉ መብት አለው? ህዝቡ የሰጠው ድምፅ እንደሚከበርለት ዋስትና አለው? የህዝብ ድምፅ የሚያከብር ገለልተኛ የምርጫ ቦርድ አለ? ህዝቡ ከምርጫ በኋላ ምንም ዓይነት ዛቻና አድልዎ እንደማይደርሰው የሚተማመንባቸው ተቋማት አሉት? እነዚህ ጥያቄዎች በአግባቡ መመለስ ካልቻልን በምርጫ ጣቢያ ወረፋ ይዞ መዋል ጥቅም የለውም።

ምርጫው በተመለከተ አንድ አስተያየት ሰጪ የ ሰጠኝ ሓሳብ ላካፍላቹና ላብቃ። እሱ እንዲህ ይላል፦

“ለሁሉም ሰራተኞች (የኛ መስራቤት) ካርድ የጠፋቹ ከዕለት 01/08/2005 የምዝገባ ካርድ ውሰዱ የሚል ማስጠንቀቅያ አይነት ወጣ:: የምዝገባ ቀን ከተዘጋ ግን ከአንድ ወር በላይ አልፎታል:: የምርጫ ጣብያዎች ደሞ የህወሓት ሰዎች እርስ በርሳቸው ብቻ እንደሚወዳደሩት እንደሆነ ተወዳዳሪዎች ራሳቸው ነገሩን:: ከኛ ሰራተኞች ደሞ እኛ እገሌ እገሌ/3/ ሰዎቸ እጩ ተወዳዳሪ ነን አሉን:: የሚገርመው ከተወዳዳሪዎቹ ያሸንፋሉ ተብለው የሚጠበቁ ሁሉት ሲሆኑ የሚወከሉት ወረዳ ተወላጅ ሳይሁኑ የሌላ ቦታ ተወላጅ መሆናቸውና በሰራተኞችና በተማሪዎች ምርጫ አጭበርብረው የወረዳ ምክር ቤት ወንበር ለማግኘት እንጅ ህዝብ ሊመርጣቸው ይቅር እንደማያውቃቸው ነው:: እንዲህም አሉ በምርጫ ቀን ሰአት ቆጥረን በአንድ እንሄዳለን በአንድ እንመለሳለን:: በተጨማሪ ከህወሓት ውጭ መምረጥ የሚፈልግ ሰው የት ሂዶ ይምረጥ ተብለወ ሲመልሱ ህወሓትን የማይመርጥ ሰው ካለ የX (ኤክስ) የሚመርጥ ደሞ – (ራይት) ምልክት ያድርግ ብለው አጃጃሉን:: ግን የኤክስ ወይም ራይት ምልክት ማስቀመጥ ማለት መምረጥ ማለት ነው እንዲያውም አንመርጥም’ የሚል ድምፅ ቁጥር አይገባም ብየ ስጠይቃቸው ወረዱብኝ::”